නව යොවුන් විය යනු වයස අවුරුදු 10 ත් 19 ත් අතර ළමා කාලයේ සිට වැඩිහිටිභාවය දක්වා සංක්‍රාන්තිමය කාල පරිච්ඡේදයකි. වැඩිවිය පැමිණීමේදී සිදුවන මූලික වෙනස්කම් සමඟ මෙම පරිණත භාවය පැමිණේ. මෙම වැඩෙන අවධිය වැඩිවිය පැමිණීමේ මූලික වෙනස්කම් සමඟ ආරම්භ වේ. මානසික වශයෙන් පරිණත වීමත් සමඟම හෝමෝන වෙනස්වීම් නිසා ශරීරයද ඉක්මනින් වෙනස් වන අතර එය වේගවත් ශාරීරික වර්ධනයකට මග පාදයි.

මෙම වේගවත් ශාරීරික වර්ධනයට සහාය වීම සඳහා යෞවන වයසේදී නිසි පෝෂණය ඉතා වැදගත් වේ. මෙම සංක්‍රාන්ති කාල පරිච්ඡේදයේදී මනා පෝෂණයක් ලබාගැනීමේ මූලික කරුණු අවබෝධ කර ගැනීමෙන් යෞවන වයසේ සංක්‍රාන්තියට සහාය වීම පමණක් නොව ජීවිත කාලය පුරාම සෞඛ්‍ය සම්පන්න ආහාර පුරුදු ඇති කර ගැනීමටද උපකාරී වේ.

පෝෂ්‍ය පදාර්ථ බහුල ආහාර පිළියෙළ කිරීමට සහ අහාරයට ගැනීමට දෙමාපියන්ට, භාරකරුවන්ට සහ යෞවනයන්ට සහාය වීමට පහත දැක්වෙන උපදෙස් උපකාරී වේ.

1. සමබර ආහාර වේල් - සමබර ආහාර වේලක් අත්‍යවශ්‍ය ආහාර කාණ්ඩවලින් සමන්විත වන අතර සාමාන්‍ය අහාර පිඟානකින් ¼ ක් කාබෝහයිඩ්‍රේට් වලින් ද (ධාන්‍ය පාන්, බත් හෝ පැස්ටා) ¼ ක් ප්‍රෝටීන් වලින් ද (බිත්තර, මස්, මාළු, බෝංචි සහ ඇට වර්ග) සහ ½ ක් වර්ණවත් එළවළු සහ සෞඛ්‍ය සම්පන්න ප්‍රභවයන්ගෙන් ලබාගත් මේදවලින්ද (මාළු, අලිගැටපේර සහ සෞඛ්‍ය සම්පන්න තෙල් වැනි) සමන්විත විය යුතුය. නව යොවුන් වියේදී මාංශ පේශි සහ අස්ථි වර්ධනය වැඩිවීමත් සමඟ ලබාගන්නා ප්‍රෝටීන් ප්‍රමාණය වැඩි කිරීම සහ ආහාර වේල හරහා කැල්සියම්, යකඩ, සින්ක් සහ විටමින් ඩී වැනි විටමින් සහ ඛනිජ ලවණ පරිභෝජනය කිරීම අත්‍යවශ්‍ය වේ.

2. ප්‍රමාණවත් දියර ප්‍රමාණයක් ලබා ගැනීම - නව යොවුන් වියේ පසුවන්නන් දිනකට අවම වශයෙන් වතුර වීදුරු (උස) 6ත් 8ත් අතර ප්‍රමාණයක් පානය කිරීම සඳහා ඉලක්ක කළ යුතු අතර ශාරීරික ක්‍රියාකාරකම්වල යෙදෙන්නේ නම් මෙම ප්‍රමාණය වැඩි විය යුතුය. ආහාර දිරවීමට, පෝෂ්‍ය පදාර්ථ අවශෝෂණය කර ගැනීමට සහ ශක්ති මට්ටම් පවත්වා ගැනීමට ජලය වැදගත් වේ.

3. කෙටි ආහාර සඳහා සෞඛ්‍ය සම්පන්න විකල්ප - යෞවනයන්ට ප්‍රධාන ආහාර වේල් අතර බොහෝ විට කුසගිනි දැනෙන අතර කෙටි ආහාර ගැනීමට පෙළඹේ. අධික සීනි සහිත සැකසූ ආහාර වෙනුවට පලතුරු, යෝගට් හෝ ඇට වර්ග වැනි සෞඛ්‍ය සම්පන්න විකල්ප තෝරා ගැනීමෙන් ඔවුන්ගේ කුසගින්න නිවා ගැනීමට මෙන්ම අත්‍යවශ්‍ය පෝෂ්‍ය පදාර්ථ ලබා දීමටද හැකිය.

4. සැකසූ හෝ ක්ෂණික ආහාර සීමා කිරීම - ක්ෂණික ආහාර බහුලව සහ පහසුවෙන් ඇණවුම් කිරීමේ හැකියාව වැඩි වීමත් සමඟ පෝෂ්‍ය පදාර්ථ අඩු ආහාර පරිභෝජනය කිරීමේ වැඩි ප්‍රවණතාවක් පවතී. මෙම ආහාරවල කැලරි ප්‍රමාණය අධික බැවින් ශරීරයේ බර වැඩි වීමට ඉඩ ඇති නමුත් අත්‍යවශ්‍ය පෝෂ්‍ය පදාර්ථ අඩංගු නොවේ. මෙය නව යොවුන් වියේ පසුවන්නන් තරබාරුකම සහ දියවැඩියාව වැනි රෝගවලට ගොදුරු වීමේ අවදානමක් ඇති කරයි.

මීට අමතරව, නව යොවුන් වියේ යෞවනයන් සිය සම වයසේ මිතුරන්ගේ හැසිරීම්වලට බලපෑම් කරන අතර පීඩනයට ලක්වීමේ අවදානමක් ඇති බව වටහා ගැනීම ද වැදගත් ය. මෙය ඔවුන් අහිතකර ආහාර ගැනීමේ පුරුදු, ආහාර වේල් මඟ හැරීම, සෞඛ්‍යයට අහිතකර විලාසිතා ආහාර රටා අනුගමනය කිරීම සහ ශරීරයේ ස්වරූපය පිළිබඳ ගැටළු ඇති කිරීමට හේතු විය හැක. එබැවින් දෙමාපියන් සහ භාරකරුවන් පෝෂණයේ වැදගත්කම, ආහාර සැලසුම් කිරීම, ශරීරයේ හැඩය සහ යහපැවැත්ම ගැන විවෘතව කතා කිරීමෙන් නව යොවුන් වියේ මුල් භාගයේදීම සෞඛ්‍ය සම්පන්න ආහාර ගැනීමේ පුරුදු ඇති කිරීම වඩාත් පහසු වේ.

යොවුන් වියේදී හොඳින් ආහාර ගැනීම මෙන්ම සමස්ත සෞඛ්‍ය සහ යහපැවැත්ම වැඩි දියුණු කිරීමට සහ පවත්වා ගැනීමට අත්‍යවශ්‍ය වන ශාරීරික ක්‍රියාකාරකම්වල වැදගත්කම දෙමාපියන්, භාරකරුවන් සහ අධ්‍යාපනඥයින් අවධාරණය කළ යුතුය.

යොවුන් වියේදී සෞඛ්‍ය සම්පන්නව ආහාර ගැනීම පිළිබඳ හෝ යෞවනයන් සමඟ සෞඛ්‍ය සම්පන්න සංවාද ආරම්භ කරන්නේ කෙසේද සහ පවත්වාගෙන යන්නේ කෙසේද යන්න පිළිබඳ වැඩිදුර තොරතුරු සඳහා කරුණාකර ශ්‍රී ලංකා පවුල් සංවිධාන සංගමයේ පවුල් සෞඛ්‍ය මධ්‍යස්ථානය හෝ ආලෝකය උපදේශන මධ්‍යස්ථානය අමතන්න

+94112555455, අංක 37/27, බුලර්ස් පටුමග, කොළඹ-07