ප්‍රසව හා නාරිවේද වෛද්‍යවරයකු හමුවීම බොහෝ කාන්තාවන් අපහසුතාවයට සහ රෝග විනිශ්චයට ඇති බිය නිසා කල් දැමීමට පෙළඹෙන කාර්යයක් විය හැකි නමුත් එය කාන්තාවකගේ යහපැවැත්මේ තීරණාත්මක අංගයකි. වෛද්‍යවරයා හමුවීමේදී එය ඔබේ පළමු හමුවීම වුවත් ඔබ කිහිප වතාවක්ම පැමිණ තිබුණත් මෙම හමුවීමෙන් අපේක්ෂා කළ යුත්තේ කුමක්දැයි දැන සිටීම ඔබගේ බිය සමනය කිරීමට, හමුවීම වඩාත් කළමනාකරණය කිරීමට, තොරතුරු ලබා ගැනීමට සහ සවිබල ගැන්වීමට උපකාරී වේ.

ප්‍රසව හා නාරිවේද වෛද්‍යවරයකු ලබා දෙන සේවා මොනවාද?

ප්‍රසව හා නාරිවේද වෛද්‍යවරුන් ගර්භාෂය, පැලෝපීය නාල, ඩිම්බ කෝෂ සහ යෝනි මාර්ගය ඇතුළු කාන්තා ප්‍රජනක පද්ධතිය පිළිබඳ විශේෂඥයින් වන අතර පියයුරු පිළිකා පරීක්ෂාව ඇතුළු සාමාන්‍ය සෞඛ්‍ය පරීක්ෂාවන් ද අධීක්ෂණය කරයි.

• ඔසප් වීමේ තත්ත්වයන්, අසාමාන්‍ය යෝනි ශ්‍රාවයන් යනාදිය ඇතුළුව කාන්තා ප්‍රජනක පද්ධතියට අදාළ තත්ත්වයන් හඳුනා ගැනීම සහ ප්‍රතිකාර කිරීම.

• ලිංගික ආශාව අඩුවීම, වේදනාකාරී ලිංගික සංසර්ගය යනාදිය වැනි ලිංගික සෞඛ්‍යයට අදාළ තත්ත්වයන් හඳුනා ගැනීම සහ කළමනාකරණය කිරීම.

• මුල් අවධියේදී හඳුනා ගැනීම වඩා හොඳ ප්‍රතිකාර ප්‍රතිඵලවලට මග පාදන බැවින් පැප් පරික්ෂාව ඇතුළු ගැබ්ගෙල පරීක්ෂාව සහ ඒවා වලක්වාගැනීමේ සත්කාර.

• ලිංගිකව සම්ප්‍රේෂණය වන ආසාදන (STIs) සම්බන්ධ පරීක්ෂා කිරීම.

• කාන්තා ප්‍රජනක පද්ධතියේ අල්ට්‍රා සවුන්ඩ් ස්කෑන් පරීක්ෂණ.

• සරු බව පිලිබඳ ප්‍රතිකාර සහ මද සරුභාවය හඳුනා ගැනීම සහ කළමනාකරණය කිරීම.

• පූර්ව ප්‍රසව උපදේශනය සහ ගර්භණී පරීක්ෂා කිරීම.

• පූර්ව ප්‍රසව ගර්භණීභාවය.

• ආරක්ෂිත ලිංගික පුරුදු ඇතුළුව ලිංගික සහ ප්‍රජනක සෞඛ්‍ය උපදේශනය.

• උපත් පාලන උපදේශනය සහ සේවා.

• ආර්තවහරණය හඳුනා ගැනීම සහ ප්‍රතිකාර කිරීම.

• හෝමෝන අසමතුලිතතාවය හඳුනා ගැනීම සහ ප්‍රතිකාර කිරීම.

• සාමාන්‍ය සෞඛ්‍ය පරීක්ෂා කිරීම්.

ප්‍රසව හා නාරිවේද වෛද්‍යවරයකු හමුවීමේදී අපේක්ෂා කළ යුත්තේ කුමක්ද?

ප්‍රසව හා නාරිවේද වෛද්‍යවරයකු හමුවීම සඳහා වේලාවක් වෙන් කර ගැනීමෙන් පසු ඔවුන් මුලින්ම ඔබේ වෛද්‍ය ගැටලු සහ ඔබේ අතීත වෛද්‍ය හෝ නාරිවේද ඉතිහාසය හොඳින් අවබෝධ කර ගැනීම සඳහා ප්‍රශ්න මාලාවක් අසනු ඇත.

ඔබේ ගැටලු සහ වෛද්‍ය ඉතිහාසය මත පදනම්ව නාරිවේද වෛද්‍යවරයා යම් පරීක්ෂණ නිර්දේශ කළ හැකිය. සාමාන්‍ය පරීක්ෂණවලට උස, බර සහ රුධිර පීඩනය පරීක්ෂා කිරීම ඇතුළත් වේ. ඕනෑම පරීක්ෂණයක් සිදු කිරීමට පෙර වෛද්‍යවරයා ඔබෙන් කැමැත්ත විමසනු ඇත. මෙම ක්‍රියා පටිපාටි අපහසු විය හැකි නමුත් ඒවා වේදනාකාරී නොවිය යුතු අතර ක්‍රියා පටිපාටියේ ඕනෑම අවස්ථාවක ඔබට වේදනාවක් දැනේ නම් ඔබේ වෛද්‍යවරයාට දැනුම් දීම වැදගත් වේ.

පොදු නාරිවේද පරීක්ෂණ:

• ශ්‍රෝණි පරීක්ෂණය – බාහිර ලිංගික අවයව සහ යෝනි කුහරයේ අසාමාන්‍යතා පරීක්ෂා කිරීම සඳහා ඉණෙන් පහළ කොටසේ ඇඳුම් ඉවත් කර ඔබේ පිටුපසට හේත්තු වී දණහිස් නවා පසුව ඔබේ දණහිස් ඈත් කිරීම අවශ්‍ය වේ. වෛද්‍යවරයා බාහිර ලිංගේන්ද්‍රිය පරීක්‍ෂා කර පසුව යෝනි මාර්ගයට ඇඟිලි 2ක් මෘදු ලෙස ඇතුල් කර ඩිම්බ කෝෂ හෝ ගර්භාෂය වැනි යාබද ව්‍යුහයන්ගෙන් යම් මුදු මොළොක් බවක් හෝ අසාමාන්‍ය වර්ධනයක් තිබේදැයි පරීක්ෂා කරනු ඇත.

• ස්පෙකියුලම් පරීක්ෂණය – ස්පෙකියුලම් නම් කුඩා හිස් උපකරණයක් යෝනි මාර්ගයට ඇතුල් කර විවෘත කරයි එමඟින් වෛද්‍යවරයාට යෝනි මාර්ගය සහ ගැබ්ගෙල (ගර්භාෂයට පිවිසෙන දොරටුව) සෘජුවම පරික්ෂා කිරීමට හැකි වේ. පසුව ලිංගිකව සම්ප්‍රේෂණයවන ආසාදන (STIs) පිලිබඳ පරීක්ෂණ හෝ ගැබ්ගෙල පරීක්ෂා කිරීම සඳහා යෝනි කුහරයෙන් හෝ ගැබ්ගෙලෙන් සාම්පල කුඩා උපකරණ භාවිතා කරමින් ලබා ගත හැක.

පොදු ප්‍රසව හා නාරිවේද පරීක්ෂණ:

• ශ්‍රෝණි අල්ට්‍රා සවුන්ඩ් ස්කෑන් පරීක්ෂණය

• ට්‍රාන්ස්වජයිනල් අල්ට්‍රා සවුන්ඩ් ස්කෑන් පරීක්ෂණය

• පැප් පරීක්ෂාව

• යෝනි පරීක්ෂාව

ඔබේ වෛද්‍ය හමුව වඩාත් යහපත් කරගැනීම සඳහා උපදෙස් කිහිපයක් මෙන්න:

• ඔබට ඇති ප්‍රශ්න හෝ ගැටළු ලියා එය ඔබ සමඟ හමුවීමට රැගෙන යන්න

• ඔබේ අතීත වෛද්‍ය, නාරිවේද සහ ලිංගික ඉතිහාසය ගැන අවංක වන්න.

• ඔබේ මනස සන්සුන් කර ගැනීමට ගැඹුරු හුස්ම ගන්න සන්සුන් වන්න.

ශ්‍රී ලංකාවේ පෞද්ගලික සහ රජයේ සෞඛ්‍ය සේවා අංශවලින් මෙන්ම ශ්‍රී ලංකා පවුල් සංවිධාන සංගමය වැනි ඇතැම් රාජ්‍ය නොවන සංවිධානවලින් (NGOs) ප්‍රසව හා නාරිවේද සේවාවන් ලබා ගත හැකිය. රජයේ සෞඛ්‍ය සේවා අංශයේ සේවා නොමිලේ ලබාදෙන නමුත් පෞද්ගලික සෞඛ්‍ය සේවා සහ රාජ්‍ය නොවන සංවිධානවල සහනදායී මිලකට ලබා ගත හැකිය.

ප්‍රසව හා නාරිවේද සේවා ඔබේ ප්‍රජනක සෞඛ්‍යය පවත්වා ගැනීමට වැදගත් අංගයක් වන අතර ඒවා ප්‍රමාද නොකළ යුතුය. මෙම වෛද්‍ය හමුවෙන් අපේක්ෂා කළ යුත්තේ කුමක්දැයි අවබෝධ කර ගැනීමෙන් ඔබට මෙම අත්දැකීම වඩාත් සුවපහසු සහ සවිබල ගැන්වීමක් කරගත හැකිය.

ඔබට ප්‍රසව හා නාරිවේද සේවා පිළිබඳ වැඩිදුර තොරතුරු ලබාගැනීම සහ කාන්තා සෞඛ්‍ය තත්ත්වයන් පිළිබඳ උපදෙස් සඳහා, 0112 555 455 / 077 955 2979 අංකයෙන් ශ්‍රී ලංකා පවුල් සංවිධාන සංගමය අමතන්න. එසේ නොමැති නම් 37/27, බුලර්ස් පටුමග, කොළඹ-07 හි පිහිටි පවුල් සෞඛ්‍ය මධ්‍යස්ථානයට පිවිසෙන්න.