உணவுப் பழக்கங்கள், உடல் தோற்றம் மற்றும் உளநலத்தைப் புரிந்துகொள்ளல்

நல்ல ஊட்டச்சத்து என்பது நாம் என்ன உணவு உண்கிறோம் என்பதைக் குறித்து மட்டுமல்ல; உணவு மற்றும் நமது உடலைப் பற்றி நாம் எவ்வாறு சிந்திக்கிறோம், உணர்கிறோம் என்பதையும் உள்ளடக்கியது. வளரிளம் பருவம் மற்றும் இளம் வயதில், உடலில் ஏற்படும் மாற்றங்கள், சமூக அழுத்தங்கள் மற்றும் உணர்வுசார் மன அழுத்தம் ஆகியவை சில நேரங்களில் உணவுப் பழக்கங்களையும், தன்னைப் பற்றிய எண்ணங்களையும் பாதிக்கக்கூடும். இத்தகைய சில பழக்கவழக்கங்கள் உண்ணுதல் கோளாறு (Eating Disorder) அல்லது அதனுடன் தொடர்புடைய உளநலப் பிரச்சினைகளாக உருவாகக்கூடும்.

உண்ணுதல் கோளாறுகள் (Eating Disorders) மற்றும் ஊட்டச்சத்து தொடர்பான கவலைகள் (கேள்வி–பதில் பகுதி)

1. உண்ணுதல் கோளாறுகள் என்றால் என்ன?

உண்ணுதல் கோளாறுகள் என்பது உணவு, உடல் எடை மற்றும் தன்னைப் பற்றிய தோற்றம் ஆகியவற்றுடனான ஒருவரின் உறவைப் பாதிக்கும் தீவிரமான உளநல நிலைகளாகும். இவை வெறுமனே “உணவுக் கட்டுப்பாட்டு பழக்கங்கள்” அல்லது வாழ்க்கை முறைத் தேர்வுகள் அல்ல. மாறாக, அவை உண்பது தொடர்பான தொடர்ச்சியான மற்றும் ஆரோக்கியமற்ற எண்ணங்களையும் நடத்தைகளையும் உள்ளடக்கியவை; இவை பெரும்பாலும் மன உளைச்சல், பதட்டம் அல்லது குறைந்த சுயமரியாதையுடன் தொடர்புடையவை.

உண்ணுதல் கோளாறுகள் உடல் ஆரோக்கியம், உணர்வுசார் நல்வாழ்வு, உறவுகள் மற்றும் அன்றாட செயல்பாடுகளைப் பாதிக்கக்கூடும்.

2. Anorexia Nervosa (அனோரெக்ஸியா நெர்வோசா) என்றால் என்ன?

Anorexia Nervosa என்பது உடல் எடை அதிகரித்துவிடும் என்ற தீவிரமான பயத்தின் காரணமாக ஒருவர் உட்கொள்ளும் உணவின் அளவை மிகவும் கடுமையாகக் குறைக்கும் ஒரு உண்ணுதல் கோளாறாகும். உடல் எடை குறைவாக இருந்தாலும், தாங்கள் அதிக எடையுடன் இருப்பதாக அவர்கள் எண்ணக்கூடும். இந்தத் திரிபடைந்த உடல் தோற்றப் பார்வையின் காரணமாக, தீவிரமான உணவுக் கட்டுப்பாடு, உணவைத் தவிர்த்தல், குறிப்பிட்ட உணவுகளைத் தவிர்த்தல் அல்லது உணவு உட்கொள்வதை அதிகமாகக் கட்டுப்படுத்துதல் போன்ற நடத்தைகள் ஏற்படலாம். காலப்போக்கில், இது ஊட்டச்சத்துக் குறைபாடு, பலவீனம், ஹோர்மோன் மாற்றங்கள் மற்றும் உடல் உறுப்புகள் தொடர்பான கடுமையான உடல்நல அபாயங்கள் போன்ற சிக்கல்களுக்கு வழிவகுக்கலாம்.

3. Bulimia Nervosa என்றால் என்ன?

Bulimia Nervosa என்பது குறுகிய காலத்தில் அதிக அளவு உணவை மீண்டும் மீண்டும் உட்கொள்வது (அதிகமாக உண்பது) மற்றும் அதன் பின்னர் உட்கொண்ட உணவின் விளைவுகளை ஈடுசெய்யும் நோக்கில் சில நடத்தைகளில் ஈடுபடுவது போன்றவற்றை உள்ளடக்கிய ஒரு உண்ணுதல் கோளாறாகும். இவற்றில் வாந்தி எடுப்பது, உணவைத் தவிர்ப்பது அல்லது அளவுக்கு அதிகமாக உடற்பயிற்சி செய்வது போன்றவை அடங்கும். Bulimia உள்ளவர்கள் உணவு உட்கொள்ளும் நேரத்தில் தங்களால் கட்டுப்படுத்த முடியாத உணர்வை அனுபவிக்கக்கூடும். அதன் பின்னர் குற்ற உணர்வு, அவமானம் அல்லது மன உளைச்சல் ஏற்படலாம். Anorexia-வைப் போலன்றி, இவர்களின் உடல் எடை எப்போதும் குறைவாகத் தோன்றாது. இதனால் இந்தக் கோளாறை அடையாளம் காண்பது மிகவும் கடினமாக இருக்கலாம்.

4. Anorexia மற்றும் Bulimia ஏற்படுவதற்கான காரணங்கள் என்ன?

உணவுக் கோளாறுகளுக்கு ஒரே ஒரு காரணம் இல்லை. இவை பொதுவாக உயிரியல், உளவியல் மற்றும் சமூக காரணிகளின் கலவையால் உருவாகின்றன. குறிப்பிட்ட தோற்றத்தைப் பெற வேண்டும் என்ற அழுத்தம், ஊடகங்களில் காட்டப்படும் யதார்த்தமற்ற உடல் தோற்றத் தரநிலைகள், உடல் அளவு குறித்து கேலி செய்தல் அல்லது கொடுமைப்படுத்துதல், அதிர்ச்சிகரமான அனுபவங்கள், முழுமைத்தன்மையை நாடும் குணம் (perfectionism), அல்லது பதற்றம் மற்றும் மனச்சோர்வு போன்ற அடிப்படை உளநலப் பிரச்சினைகள் ஆகியவை இதில் அடங்கும். மேலும், மரபியல் மற்றும் குடும்ப வரலாறும் ஒரு பங்கைக் கொண்டிருக்கலாம்.

5. எச்சரிக்கை அறிகுறிகள் யாவை?

எச்சரிக்கை அறிகுறிகள் நபருக்கு நபர் மாறுபடலாம். பலரில் பொதுவாகக் காணப்படும் சில அறிகுறிகள்:

• உடல் எடை, உடல் வடிவம் அல்லது கலோரிகள் குறித்து அதீத கவலை
• உணவைத் தவிர்த்தல் அல்லது மிகக் குறைந்த அளவு உணவு உட்கொள்ளுதல்
• மற்றவர்களுடன் சேர்ந்து உணவு உட்கொள்வதைத் தவிர்த்தல்
• அடிக்கடி உடல் எடையை அளத்தல் அல்லது தமது உடலைத் தொடர்ந்து பரிசோதித்தல்
• திடீர் உடல் எடை குறைதல் அல்லது உடல் எடையில் குறிப்பிடத்தக்க மாற்றங்கள்
• உணவு உட்கொண்ட பின்னர் அடிக்கடி கழிப்பறைக்குச் செல்லுதல்
• அளவுக்கு அதிகமான உடற்பயிற்சி பழக்கங்கள்
• எரிச்சல், பதற்றம் அல்லது சமூகத்திலிருந்து விலகுதல் போன்ற மனநிலை மாற்றங்கள்

6. இதில் பாதிக்கக்கூடிய அதிக ஆபத்து யாருக்கு உள்ளது?

பாலினம், வயது அல்லது பின்னணி எதுவாக இருந்தாலும், உண்ணுதல் கோளாறுகள் யாரையும் பாதிக்கக்கூடும். இருப்பினும், உடல் வளர்ச்சியின்போது ஏற்படும் மாற்றங்கள், சக நண்பர்களின் அழுத்தம் மற்றும் சமூக ஊடகங்களின் தாக்கம் காரணமாக வளரிளம் பருவத்தினரும் இளம் வயதினரும் அதிகம் பாதிக்கப்படக்கூடியவர்களாக இருக்கலாம். குறைந்த சுயமதிப்புணர்வு, அதிக கல்வி அல்லது தனிப்பட்ட அழுத்தம், கொடுமைப்படுத்தப்பட்ட வரலாறு அல்லது குடும்பத்தில் ஏற்படும் மன அழுத்தம் போன்ற காரணிகளைக் கொண்டவர்களுக்கும் அதிக ஆபத்து இருக்கலாம்.

7. உண்ணுதல் கோளாறுகள் உடல் நலத்தைப் பாதிக்க முடியுமா?

ஆம். உண்ணுதல் கோளாறுகள் உடலில் கடுமையான மற்றும் சில சமயங்களில் உயிருக்கு ஆபத்தான விளைவுகளை ஏற்படுத்தக்கூடும். அவற்றில் ஊட்டச்சத்துக் குறைபாடு, சோர்வு, தலைச்சுற்றல், செரிமானப் பிரச்சினைகள், நோய் எதிர்ப்பு சக்தி குறைதல், இதயம் தொடர்பான சிக்கல்கள், ஹோர்மோன் சமநிலையின்மை மற்றும் இளம் வயதினரின் வளர்ச்சி அல்லது உடல் மேம்பாட்டில் தாமதம் போன்றவை அடங்கும். மேலும், உளநலமும் பாதிக்கப்படலாம். இதனால் பதற்றம், மனச்சோர்வு மற்றும் சமூகத்திலிருந்து விலகுதல் போன்ற பிரச்சினைகள் ஏற்படலாம்.

8. உண்ணுதல் கோளாறுகளுக்கு சிகிச்சை அளிக்க முடியுமா?

ஆம். உண்ணுதல் கோளாறுகளுக்கு சிகிச்சை அளிக்க முடியும், மேலும் சரியான ஆதரவுடன் குணமடைதலும் சாத்தியமாகும். இதற்கான சிகிச்சையில் பொதுவாக உளவியல் ஆலோசனை, ஊட்டச்சத்து ஆதரவு மற்றும் மருத்துவப் பராமரிப்பு ஆகியவை இணைந்து வழங்கப்படுகின்றன. ஆரம்பத்திலே கண்டறிந்து சிகிச்சையளிப்பது மிகவும் முக்கியமானது. ஏனெனில் அது குணமடையும் வாய்ப்புகளை மேம்படுத்துகிறது. மேலும், குடும்பத்தினர், நண்பர்கள் மற்றும் சுகாதார நிபுணர்களின் ஆதரவு குணமடைவதில் முக்கியப் பங்கு வகிக்கிறது.

9. உண்ணுதல் கோளாறு உள்ள ஒருவருக்கு நான் எவ்வாறு ஆதரவளிக்கலாம்?

ஒருவருக்கு ஆதரவளிப்பதற்குப் பொறுமையும் புரிதலும் தேவை. அவர்களின் தோற்றம் அல்லது எடையில் கவனம் செலுத்துவதைத் தவிர்க்கவும். அதற்குப் பதிலாக, எந்தவிதமான தீர்ப்பும் வழங்காமல் அவர்கள் சொல்வதைக் கேளுங்கள், மேலும் தொழில்முறை உதவியை நாடுமாறு அவர்களை ஊக்குவிக்கவும். அவர்களைச் சாப்பிட வற்புறுத்தவோ அல்லது அவர்களின் நடத்தையை விமர்சிக்கவோ வேண்டாம். அக்கறையை வெளிப்படுத்துதல் மற்றும் அவர்களுடன் இருப்பது போன்ற எளிய உணர்வுசார் ஆதரவும், அவர்கள் பாதுகாப்பாக உணர்ந்து உதவியை நாடுவதற்கு பெரிதும் உதவக்கூடும்.

10. இலங்கையில் ஒருவர் இதற்கான உதவியை எங்கு பெறலாம்?

ஊட்டச்சத்து, உணவுப் பழக்கங்கள், உடல் தோற்றம் அல்லது உணர்வுசார் நல்வாழ்வு தொடர்பான கவலைகளை எதிர்கொள்ளும் எவருக்கும் இரகசியமான ஆதரவு கிடைக்கிறது. நீங்கள் இதைத் தனியாக எதிர்கொள்ள வேண்டியதில்லை. பயிற்சி பெற்ற ஆலோசகர்கள் மற்றும் ஊட்டச்சத்து நிபுணர்கள் உள்ளிட்ட நிபுணர்களின் உதவியைப் பெறலாம்.

இளைஞர்கள் FPA Sri Lanka-வின் Happy Life Call Centre-ஐத் தொடர்புகொண்டு தனிப்பட்ட, ஆதரவு, ஆலோசனை மற்றும் வழிகாட்டுதலைப் பெறலாம். தேவையான சந்தர்ப்பங்களில், ஆரோக்கியமான உணவுப் பழக்கங்கள் மற்றும் குணமடைதலுக்கான ஆதரவு தொடர்பாக தொழில்முறை ஆலோசனைகளை வழங்குவதற்கு தகுதியான ஊட்டச்சத்து நிபுணரை FPA சேவைகள் மூலம் அணுகலாம்.

நீங்கள் பின்வரும் இலக்கங்கள் மூலம் எங்களைத் தொடர்புகொள்ளலாம்:

077 955 2979 – Bloom by FPA Sri Lanka

076 588 4881 / 076 588 4882 – Happy Life Call Centre (தொலைபேசி அழைப்பு அல்லது WhatsApp)

077 989 5252 – Alokaya Counselling Centre

அனைத்து சேவைகளும் இரகசியமானவை. உங்கள் உடல் மற்றும் உணர்வுசார் நல்வாழ்வை பாதுகாப்பான, மரியாதையான சூழலில் ஆதரிப்பதற்காக இச்சேவைகள் வழங்கப்படுகின்றன.