ප්‍රශ්නය: පශ්චාත් (පසු) ප්‍රසව පවුල් සැලසුම්කරණය වැදගත් වන්නේ ඇයි?

පිළිතුර: දරු ප්‍රසූතියෙන් පසු ඔබේ ශරීරය නැවත යථා තත්ත්වයට පත් වීම සඳහා ප්‍රමාණවත් කාලයක් අවශ්‍ය වේ. පවුල් සැලසුම්කරණය මඟින් ඔබේ මෙන්ම ඔබේ බිළිඳාගේ සෞඛ්‍යය හා යහපැවැත්ම සුරක්ෂිත කරමින්, ඔබේ මීළඟ දරුවා ආරක්ෂිතව පිළිසිඳ ගත යුතු කාලය තීරණය කිරීමට ඔබට අවස්ථාව සලසා දෙයි.

ප්‍රශ්නය: දරු ප්‍රසූතියෙන් පසු මට උපත් පාලන ක්‍රමයක් භාවිත කිරීම ආරම්භ කළ හැක්කේ කවදා සිටද?

පිළිතුර: එය ඔබ තෝරා ගන්නා ක්‍රමය සහ ඔබේ සෞඛ්‍ය තත්ත්වය මත රඳා පවතී. සමහර උපත් පාලන ක්‍රම දරු ප්‍රසූතියෙන් පසු වහාම ආරම්භ කළ හැකි අතර, තවත් සමහර ක්‍රම සති කිහිපයකට පසුව ආරම්භ කිරීමට නිර්දේශ කරනු ලැබේ. ඔබේ තත්ත්වය පිළිබඳව සලකා බලා සුදුසුකම් ලත් සෞඛ්‍ය සේවා සපයන්නෙකුට ඔබට මේ සඳහා නිසි මඟපෙන්වීමක් ලබා දිය හැක.

ප්‍රශ්නය: බහුලව භාවිත වන පසු ප්‍රසව උපත් පාලන ක්‍රම මොනවාද?

පිළිතුර: දරු ප්‍රසුතියකින් පසුව භාවිත කළ හැකි විකල්ප ක්‍රම අතරට පහත සඳහන් ක්‍රම ඇතුළත් වේ.

• ප්‍රොජෙස්ටින් පමණක් අඩංගු පෙති

• එන්නත් කරනු ලබන උපත් පාලන ක්‍රම

• සමට යටින් තැන්පත් කරන උපත් පාලන ක්‍රම

• ගර්භාෂය තුළ තැන්පත් කරන උපකරණ

• කොන්ඩම්

ප්‍රශ්නය: මව්කිරි දෙන අතරතුර මට උපත් පාලන ක්‍රම භාවිත කළ හැකිද?

පිළිතුර: ඔව්. මව්කිරි දෙන කාලසීමාව තුළ භාවිත කිරීම සඳහා බොහෝ ආරක්‍ෂිත උපත් පාලන ක්‍රම ඇත. ගර්භාෂය තුළ තැන්පත් කරන උපකරණ (Copper IUDs) සහ කොන්ඩම් වැනි හෝමෝන රහිත ක්‍රම මේ සඳහා බහුලව නිර්දේශ කරනු ලැබේ.

ප්‍රශ්නය: මව්කිරි දීමෙන් පමණක් ගැබ් ගැනීම වැළැක්විය හැකිද?

පිළිතුර: ඔව්, මෙය 'ලැක්ටේෂනල් ඇමෙනෝරියා ක්‍රමය' (Lactational Amenorrhea Method - LAM) ලෙස හැඳින්වේ. මෙම ක්‍රමය 98% කට වඩා සාර්ථක වන නමුත්, ඒ සඳහා පහත සඳහන් කොන්දේසි සපුරා තිබිය යුතුය.

• ඔබේ බිළිඳාගේ වයස මාස 6 කට වඩා අඩු විය යුතුය.

• ඔබ දරුවාට මව්කිරි පමණක්ම ලබා දිය යුතුය (වෙනත් කිසිදු ආහාරයක් හෝ ජලය හෝ ලබා නොදිය යුතුය).

• දරු ප්‍රසූතියෙන් පසු ඔබේ ඔසප් වීම ආරම්භ වී නොතිබිය යුතුය.

මෙම කරුණුවලින් යම් එකක් හෝ වෙනස් වුවහොත්, ඔබ වහාම වෙනත් උපත් පාලන ක්‍රමයක් භාවිත කිරීම ආරම්භ කළ යුතුය.

ප්‍රශ්නය: දරු ප්‍රසූතියෙන් පසු වඩාත්ම සුදුසු උපත් පාලන ක්‍රමය මා තෝරා ගන්නේ කෙසේද?

පිළිතුර: වඩාත්ම සුදුසු විකල්පය තීරණය වන්නේ ඔබේ සෞඛ්‍ය තත්ත්වය, මව්කිරි දීමේ පවතින සක්‍රීයභාවය, අනාගත ගැබ්ගැනීම් සැලසුම් සහ ඔබේ පෞද්ගලික කැමැත්ත මතය. පුහුණුව ලත් සෞඛ්‍ය සේවා සපයන්නෙකුට ඔබට ආරක්ෂිත සහ දැනුවත් තීරණයක් ගැනීම සඳහා ඔබට උපකාර කළ හැක.

මේ සඳහා ශ්‍රී ලංකා පවුල් සංවිධාන සංගමයේ 'බ්ලූම්' (Bloom) උපකාරක සේවාව අමතන්න: 077 955 2979

ඔබට ආසන්නතම FPA සායනය සොයා ගැනීමට පිවිසෙන්න: https://bit.ly/47IvSRp

ප්‍රශ්නය: නැවත ගැබ් ගැනීමක් සඳහා මා කොපමණ කාලයක් බලා සිටිය යුතුද?

පිළිතුර: මවගේ සහ බිළිඳාගේ උපරිම සෞඛ්‍ය යහපැවැත්ම උදෙසා ඔබේ මීළඟ ගැබ් ගැනීමට පෙර අවම වශයෙන් මාස 18 සිට 24 දක්වා කාලයක් බලා සිටීම පොදුවේ නිර්දේශ කරනු ලැබේ. මෙලෙස "ප්‍රසූත පරතරය තැබීම" (Birth spacing) මඟින් ඔබේ ශරීරය සම්පූර්ණයෙන්ම යථා තත්ත්වයට පත්වීමට ඉඩ සලසන අතර, ඇති විය හැකි විවිධ සෞඛ්‍ය සංකූලතා ද අවම කරයි.